Amat-amat na nga ginacontain sang Sugar Regulatory Administration ang epekto sang red-striped soft-scale insect (RSSI) sa mga katubuhan.
Sa pahayag ni SRA Administrator Paul Ascuna, sa umpisa madamo ang mga nagpinsar nga tigi lamang ang mga sapat-sapat nga nakita sa mga katubuhan, apang matapos maglapnag ang kahalitan sang RSSI, nagkahangawa naman ang iban nga mga sugar planters.
Sa data sang SRA, yara na sa 2,077 hectares ang apektado nga katubuhan sa Negros kag Panay Island.
Nagdangat sa 18 ang apektado nga local government units sa Negros Occidental, ang banwa sang Mabinay lamang ang apektado sa Negros Oriental samtang may duha man ka apektado nga LGU sa Iloilo kag apat sa Capiz.
Suno kay Ascuna, indi nila luyag nga maglapta pa ang RSSI gani ginatinguhaan man sang mga LGUs nga makapatigayon sang pagspray sang insecticide.
Aminado naman ini nga apisar may ginhatag nga P8 million nga budget, may kabudlayan ang SRA sa pagbakal sang insecticide bangod ini ang magalabay pa sa bidding process kag magalawig sang pila ka bulan.
Indi man sila makapatigayon sang emergency purchase bangod wala man sang LGUs nga nagdeklarar sang State of Emergency.
Sa pihak sini apisar sang malapad nga record sang kahalitan, paathag ni Ascuna nga indi bilog nga kakampuhan ang apektado kundi porsyon lamang kag madutay lamang ang severely affected.
Ginapakamaayo man sini nga wala pa nakatabok sa Mindanao ang RSSI kag ini ang ila ginaproteksyonan bangod sang nakaligad nga milling season dako na ang improvement sa ila sugar production partikular ang gikan sa Bukidnon.
