Magapatigayon sang Motu Proprio investigation ang Commission on Human Rights Negros Island Region angot sa serye sang mga pagpamatay sa Negros Occidental nga gin-ako sang New People’s Army.
Sa interview sang Bombo Radyo Bacolod kay Vincent Parra, Investigation Division chief sang CHR-NIR, may-ara sang narecord nga pito ka kaso sang pagpamatay nga gin-ako sang NPA humalin sang bulan sang Mayo tubtob Hunyo.
Sa pito, apat ka kaso ang natabo sa banwa sang Toboso, may-ara man sa Victorias kag EB Magalona.
Magluwas sa pito, ginapaverify pa sang CHR-NIR ang kaso sang pagpatay sa Himamaylan City nga gina-alegar kahimuan man sang NPA.
Sa mando ni CHR-NIR officer-in-charge Atty Gazzelenne Corsame-Fuentes, suguran na sang mga ini ang imbestigasyon sa masunod nga semana.
Nahibaluan nga ang nagapanguna nga papel sang CHR amo ang pagprotiher sang kabuhi.
Sa mga nagluntad nga pagpamatay, isa sa biktima ang ginapahayag sang NPA nga may kaangtanan sa illegal nga droga, ang isa ang may kaso nga rape, samtang ang iban ang ginapahayag informant ukon asset sang militar.
Ang sa Himamaylan ang ginaclaim naman sang mga ini nga nagaserbe nga guide sang militar sa Southern Negros.
Panindugan sang CHR nga kun may-ara gid man sang krimen nga nahimo, imbes nga patyon ang mga suspetsado ang dapat nga pasakaan sang kaso bangod may proseso para sa hustisya. SAMTANG…Nag-apelar ang alkalde sang banwa sang Toboso, Negros Occidental sa mga New Peoples Army nga untaton na ang pagpamatay sa mga inosente.
Madumduman nga sunod-sunod nga nagluntad ang shooting incident sa banwa kag lunsay gina-claim sang NPA nga sila ang may kahimoan sini.
Sang Mayo 14 sa Sitio Minasug-ang, Barangay Tabun-ac, ginbanggaan si Alyas Jury, 54 anyos, sang apat ka mga persona kag ginluthang sa nanarisari nga bahin sang iya lawas; Hunyo 17 ginluthang ang isa ka lalaki nga ginkilala nga si Leonardo Nepalar; Hunyo 22 duha ka mga lalaki sa Sitio Stop Aguinaldo, Barangay San Isidro ang ginluthang kag ang mga biktima ang ginkilala nga sanday Elias Palay kag Joebert Alonsado ukon alyas Putot; kag Hunyo 26, ginluthang ang 25 anyos nga si Isagani Imalay sa sulod sang iya balay sa Sitio Toril, Brgy. Bandila.
Nagapanawagan si Mayor Richard Jaojoco sa NPA nga untaton na ang pagpamatay bangod ang mga biktima may mga pamilya kag may ginapa-eskwela pa nga kabataan.
Nagpangabay man ini nga may yara sang insakto nga proseso kag indi nga gilayon lang nga patyon ang tawo.
Suno diri, luyag niya nga makakita sang solusyon agud matapna na ang madugay na nga problema sang banwa.
