Ginpahanumdom sang political analyst nga magamadinalag-on gihapon ang hustisya bisan ano pa ka ma-impluwensya ang nakahimo sang krimen.
Sa interview sang Bombo Radyo Bacolod kay political analyst Atty. Jomax Ortiz, ginsuguran na sadto ni Senator Bato Dela Rosa ang imbestigasyon apang karun lamang nag-init ang kaso bangod sa paggwa sang witness kag pagka-imbulbar sang dalagkuan nga personalidad.
Ini matapos ginbuyagyag sa whistle blower nga si alyas Totoy ukon ni Julie ‘Dondon’ Patidongan nga ginpanglubong sa Taal Lake indi lamang ang ang 37 ka mga missing sabungeros bangod suno diri masobra 100 na ang mahimo napanglubong sa lugar.
Samtang gintudlo naman nga mastermind si Charlie “Atong” Ang kag gin-involve ang anay karelasyon sini nga celebrity nga si Gretchen Barretto.
Suno kay Ortiz, dako nga kredito para kay Justice Secretary Jesus Crispin “Boying” Remulla kun mapamatud-an ang akusasyon sa gaming industry tycoon.
Bisan pa nga maghire sang lagting nga abogado si Ang, ginalantaw ni Ortiz nga siya ang indi makaluwas sa kaso kun makakita sang mabaskog nga ebidensya batok sa iya.
Ini ang ginpaanggid man sang political analyst kanday Pastor Apollo Quiboloy, expelled Congressman Arnolfo “Arnie” Teves kag former President Rodrigo Duterte nga tuman ang impluwensya apang nahimo gihapon nga maaresto.
Dugang pa sini nga indi man masalbar sang impluwensya si Ang bangod madamo sa mga contacts sini nga negosyante, kapulisan kag politiko ang mahimo nga maglikaw na sa iya bangod sa kahangawa nga maangot sa kaso.
Ini ang nagapamatuod nga wala sang exempted sa layi.
Suno kay Ortiz, kun may mabakod nga ebidensya batok kay Ang kag indi madala sa kwarta ang mga nagapadalagan sang kaso, ang mahimo na lamang sang abogado sini amo ang mapahagan-hagan ang penalidad.
Ginalantaw sini nga suhestyon man sang mga abogado nga magpagwa sang statement si Ang apang ini ang ipit-ipit lamang, bangod kun siya ang magapabilin nga maghipos, maggwa sa social media nga siya ang guilty sa krimen.
Ginaseguro man sang mga ini nga limitado lamang ang ipagwa nga statement ni Ang, bangod kun masobrahan mahimo man ini nga magamit batok sa iya kaangay sa natabo kay former President Dutere kun sa diin ang iya pag-ako sang responsibilidad sa mga mapatay sa war on drugs, ang ginagamit man sa karun batok sa iya.
