Ginapakamaayo sang grupo sang mga nagasagod sang baboy nga ginbatak na sang Cebu ang banning sa pagsulod sang baboy gikan sa iban nga probinsya.
Ang banning ang ginpatuman kadungan sang malala nga pagpanghalit sang African Swine Fever (ASF).
Ginbatak na ang banning sa tinutuyo nga mapabuno ang bili sang baboy nga tuman ka dako ang ginsaka bangod sa manubo nga supply nga gikan lamang sa ila mga local hog raisers.
Sa interview sang Bombo Radyo Bacolod kay Alliance of Hog Raisers Association of Negros Occidental (AHRANO) President Pastor Ric Lauron, maayo nga balita para sa ila nga nagbukas na ang Cebu bangod ini ang mangin dugang nga market para sa mga nagasagod sang baboy.
Pahayag sini nga dako sa karun ang supply sang baboy sa probinsya sang Negros Occidental nga nagresulta man sa pagnubo sang presyo.
Ang anay P180 tubtob P200 nga presyo sang kada kilo sang live weight, ang sa karun nagpanaog sa P160 tubtob P165.
Aminado ini nga sila ang may buyer man gikan sa Panay Island kag Manila, apang dako nga bulig kun madugang sa mahimo supplyan ang Cebu.
Suno diri, nagacontact na sa iya ang iban nga mga miyembro nga naga-ayo nga kun mahimo mapasaka ukon mamintenar na lamang ang presyo sang baboy agud sila ang ini mapierde.
