Ginhimuslan ang 7 anyos nga babayi sa Hda Carmen, Brgy Granada, Bacolod City sang isa ka lalaki nga pangayaw lamang sa lugar.
Sa interview sang Bombo Radyo kay Punong Brgy Armando Vito, sang Hunyo 29, kapin alas- 4:00 sang hapon, gindala sang 9 anyos nga magulang ang iya 7 anyos nga manghod agud magsag-ob sang tubig.
Apang ginpapungko sang magulang ang iya manghod sa bato samtang siya naman nagsag-ob sang tubig.
Naglabay ang suspek kag nakita sini ang 7 anyos nga iya ginbutong kag gindala sa isa ka payag.
Didto na sini ginhimo ang pagpanghimulos sa biktima.
Wala na nakapangayo sang bulig ang bata bangod nakita sini nga may dala nga espading kag kutsilyo ang suspek.
Naghibi na lamang ang bata sang nagdugo na ang iya kinatawo samtang nalagyo naman ang suspek sa wala nahibaluan nga dereksyon.
Suno kay Vito, una nga nanugid ang bata sa iya tiya kag bangod naglapta na sa lugar ang esturya, natigayon nga nakapalagyo ang suspek samtang ulihi naman napalab-ot sa brgy hall ang natabo.
Naghambal man ang bata nga masami siya ginahatagan sang kwarta kag ginapahulam sang cellphone sang suspek.
Nahibaluan naman nga ang duha lang ka mag-utod ang magka-upod sa ila balay bangod ang ila amay nagabyahe kag gab-i na kun magpauli samtang ang ila naman nga iloy may yara na sang bag-o nga pamilya.
Nahibaluan man nga ang suspek ang may himata lamang sa lugar kag nagapangayaw lamang didto kag may yara sang kaso sa pagpanghimulos.
Pahayag ni Vito, tuman ang iya kasubo sa na-agyan sang bata kag nagpasalig nga kun indi magpasaka sang kaso ang amay, sila mismo sa brgy mahatag sang hustisya para sa 7 anyos nga biktima.
