Natumba ang isa ka poste sang kuryente matapos nga masagaidan sang cargo truck sa Lopez Jaena St., Barangay 31, Bacolod City nga nagresulta sang isa nga nalipungan kag isa ang napilasan.
Sa interview sang Bombo Radyo Bacolod kay Barangay Kagawad Shella Mae Togle Diaz sang Barangay 31, pasado alas 3:00 ang takna sa hapon nasagaidan sang nasambit nga truck ang poste sang kuryente.
Suno kay Diaz, ang nalipong kag ang napilasan ang nagapungko sa ila ginabaligyaan sang fried chicken kag ginpili man nga magpungko didto bangud mabugnaw.
Suno diri, naglabay ang cargo truck nasagaid sini ang nagaluy-loy nga kable sang kuryente nga nagresulta sa pagkatumba sang poste.
Gilayon man nga gin-secure sang personnel sang Negros Electric and Power Corporation ang area agud masiguro nga wala sang open wires.
Panawagan sini sa Negros Power nga himuan sang tikang ang mga kable nga nagaluyloy agud nga malikawan na nga may matabo nga kaangay nga insidente.
