Ginklaro sang Schools Division Superintendent sang Department of Education division of Negros Occidental nga may nakaplastar na nga Emergency Learning Kits inkaso may ipatuman nga suspension sa face-to-face classes.
Madumduman nga nagdeklarar sang duha ka adlaw nga suspension sang face-to-face classes sa banwa sang EB Magalona sa pila ka Elementary Schools kag tanan nga Day Care centers kadungan sang pagsaka sang kaso sang Hand, Foot and Mouth Disease (HFMD).
Sa interview sang Bombo Radyo Bacolod kay Glades Amylaine Sales, matapos ginpahibalo sa mga namonitor nga kaso sang HFMD sa mga estudyante, nagpatigayon man sang technical assistance kag health education ang nurses sang DepEd Negros Occidental sa mga manunudlo, estudyante kag ginikanan.
Bilang isa man ka nurse, gin-athag ni Sales nga ang nagapanguna nga panaming agud indi malatnan sang balatian amo ang basic hygiene.
Gindis-infect man nila ang mga classrooms kag facility sa mga buluthuan nga may kaso.
Suno diri, may panibag-o nga mandato nga tanan nga mga may matukiban nga kaso sang HFMD ang automatic nga magasuspend sang face-to-face classes.
Pahayag sini nga kinahanglan lamang nga i-encode sang manunudlo kun may ma-obserbaran nga kaso sang HFMD kag ini ang maga-appear naman gilayon sa higher offices.
Apang pahanumdom sini nga sila ang may napreparar na nga Emergency Learning Kit nga sarang ma-apply kun may hinali nga deklarasyon sang suspension sang in-person classes.
Ang mga manunudlo ang magamonitor na lamang sa ila mga estudyante ukon sa ginikanan paagi sa mga group chats.
Ang mga manunudlo ang sarang naman makapili kun magawork from home ukon magareport gihapon sa eskwelahan, apang dapat lamang sundon ang mga health protocols.
Samtang required naman nga magreport sa buluthuan ang mga School Heads kag non-teaching personnel nga amo ang magaserbe nga monitoring kun sarang na nga makabalik ang face-to-face classes kag sila man ang magareport sa mga municipal/city ukon provincial health offices.
Pasalig naman ni Sales sa mga ginikanan nga wala sang dapat ika-alarma, sa baylo dapat tudluan ang mga kabataan sa husto nga paghugas sang kamot, ilisan ang bayo antes magtulog, kag dumilian anay nga maghampang sa balas.
