Ginalantaw sang negosyante nga mahimo mangin blessing in disguise para sa Pilipinas ang pagpatuman sang Estados Unidos sang reciprocal tariff.
Madumduman nga sa Agosto 1, umpisa na nga ipatuman ang mas mataas nga taripa sa produkto gikan sa Pilipinas, apang naghatag pa sang tyansa si US President Donald Trump para sa negotiation.
Sa interview sang Bombo Radyo Bacolod kay Frank Carbon, chief executive officer sang Metro Bacolod Chamber of Commerce and Industry, 17 percent lamang ang karun nga taripa para sa mga produkto gikan sa Pilipinas, apang ini ang ipasaka sa 20 porsyento sumugod sa Agosto 1.
Suno diri, ang pinakadako nga gina-export sang Pilipinas sa America amo ang semi-conductor kag electrical and electronic equipments ukon mga equipments nga ginagamit sa paghuman sang mga computer, cellphones kag iban pa nga makabig billion-peso business.
Samtang naga-export man ang pungsod sang coconut oil kag iban pa nga agricultural products, apang indi tuman ka dako.
Apang pahanumdom ni Carbon nga ang Pilipinas ang isa sa may pinakamanubo nga gindagdag nga reciprocal tariff.
Suno diri, nagadangat pa sa 30 tubtob 40 porsyento ang ipatuman nga taripa sa China, India kag bisan sa Indonesia nga makabig kompetinsya sang Pilipinas sa export.
Aminado si Carbon nga siya ang indi eksperto sa exports apang sa paglantaw sini, bentaha sa Pilipinas bangod mas manubo ang taripa nga gindagdag sa atun produkto, gani ini ang mas may manubo nga presyo kun ipaanggid sa iban nga pungsod.
Paathag sini nga indi apektado ang Pilipinas sa pagsaka sang taripa, bangod ini ang ginabayaran sang nagabatun sang produkto sa America, kag agud mabawi ang ginbayad sa mas mataas nga taripa, ginapasakaan man ang presyo sang produkto.
Ginalantaw sang negosyante nga may mga luyag si Trump nga inegosyar sa mga kapungsuran gani naghatag ini sang tyansa para sa negosasyon tubtob sa Agosto 1.
Suno diri, mahimo nga ang economic team sang Pilipinas ang magrequest nga ma-exempt sa pagpatuman ang agricultural products.
