Ginpanawagan sang assistant coach ni 8-division world boxing champion Manny ‘Pacman’ Pacquiao sa mga Pilipino nga maglantaw kag ipangamuyo ang pagdaog sang People’s Champ sa Hulyo 20, oras sa Pilipinas batok kay American boxer Mario Barrios.
Sa interview sang Bombo Radyo kay Marvin Somodio, derekta sa California, USA, padayun ang training ni Pacquaio nga umpisa nga nagsulod sa training camp sang Mayo 17.
Sa halos duha ka bulan nga preparasyon, nakita nga maayo ang kondisyon ni Pacquiao, sa parehas nga pisikal kag mental.
Suno diri, amo gihapon ang mga routines ni Pacman, kag ini ang ila lamang nga gina-alalayan.
Ini bangod kun masobrahan sa training si Pacquiao, may tion nga nagalain ang pamatyag sini kasunod nga adlaw.
Pahayag ni Somodio nga amo gihapon ang kusog kag kadasigon ni Pacman sa training, apang balantayan na lamang kun ini ang mapabilin kun yara na sa mismo nga hampang.
Aminado ang assistant coach nga ang edad sang boksider nga 46 anyos ang dako nga factor sa hampang, bangod apektado man ang iya kusog, kadasigon kag stamina, apang mas dako naman ang iya nga experience.
Sa ila pagtuon sa hampang ni Barrios, suno kay Somodio, nagasanto ang boxing style ni Pacquiao bangod ang estilo sang kasumpong ang kaangay sa mga napatumba na sadto ni Pacman.
Si Pacquiao ang ginbisita man sang pila ka boxing champions kag sang ila nga mga coaches.
Panawagan ni Somodio nga maglantaw sang hampang sa Hulyo 19 sa MGM Grand Garden Arena sa Las Vegas, USA kag ang main event ang malantaw sa Pilipinas alas-10:00 ukon alas-11:00 sang aga sa Hulyo 20.
Sa undercard, nga mahimo mag-umpisa alas-5:00 sang aga, magahampang naman sanday Mark ‘Magnifico’ Magsayo kag Olympic silver medalist Eumir Marcial.
