Ginkumpiskar sang Bacolod City Legal Office Enforcement Unit ang mga furnitures nga himo sa kahoy nga nakadisplay sa dalan Lopez Jaena, Barangay 27, Bacolod City kahapon.
Suno kay Retired Police Col. Levy Pangue, pinuno sang Bacolod City Legal Office Enforcement Unit, madamo ang nabaton nga reklamo nga tuman kabug-at ang dalag-an sang trapiko kag isa sa mga rason ang kagutok sang dalan magluwas sa traffic lights.
Suno kay Pangue, upod ang Bacolod Transportation and Traffic Management Department (BTTMD) kag ang Bacolod City Legal Office, ginhawanan nila ang dalan.
May naabtan ang enforcement unit nga nakadisplay nga mga furnitures kaangay sang bangko kag katre nga 24 oras nga ginadisplay.
Ang mga furnitures ang ginkarga sa truck agud nga mahatagan sang leksyon ang mga tag-iya nga nagabalin sang ila nga baligya sa dalan.
Ang mga nakumpiskar ang gindala sa opisina sang enforcement team sa BAYS Center likod sang Bacolod Police Station 1 bangud didto ang ila nga impounding.
Gin-issuehan naman ang mga tag-iya sang resibo bangud sa illegal vending kag man nila makuha sa tion nga mabayran ang P500 nga penalty.
Nagbutang man sang personnel sang BTTMD sa dalan Lopez Jaena bangud ang dalan ang NO Parking na bisan ang tricycle indi na magplastar didto kag ini ang himuon sa tanan nga mga dalan nga ginclear.
Ini agud nga amat amat masolusyunan ang dalagan sang trapiko santo sa tinutuyo ni Bacolod City Mayor Greg Gasataya.
