Pila ka mga persona nga may himata nga may ginabatyag ang ginpili nga mag-evacuate kadungan sang madasig nga pagsaka sang tubig-baha sa Northern Bacolod bangod sa tayuyon nga mga pag-ulan.
Sa interview sang Bombo Radyo Bacolod kay Ricardo Aloquina, 71 anyos, residente sang Purok Magbinuligay, Barangay Bata, Bacolod City nastroke ang asawa sini gani may kabudlayan sa paglakat.
Kagab-i pa lamang, nagakahangawa na ang iya asawa sa tuman ka kusog nga ulan, apang ini ang iya ginpawalaan.
Tubtob nga nakibot na lamang sila sang nalab-ot na sang tubig-baha ang foam sang hiligdaan.
Suno diri, napinsaran sang ila nga bata nga isakay sa refrigerator nga guba ang ila iloy sa pag-evacuate kag ini ang gintulod na lamang sang bana.
Pahayag ni Aloquina nga sa pagkagwa, dugay-dugay may-ara naman sang nagbulig sa ila kag sila ang ginpasakay sa tricycle padulong sa Bata Elementary School 2 nga nagserbe nga evacuation site.
Sa paghulaw sang ulan sang aga, nagdesisyon man ang mga ini nga magpauli sa ila balay.
Aminado ini nga ginabaha gid man ang ila lugar, apang ini ang pinakamataas nga nagdangat sa hawak ang kadalumon.
Samtang nag-evacuate man si Annalisa Villanes, sang Purok Tunay, Barangay Bata, Bacolod upod sa iya iloy nga manug-80 anyos.
May-ara sang hapo kag arthritis ang iya iloy gani malip-ot lamang ang sarang sini nga malakat, gani sa atubang sang stage lamang sila nagtinir imbes nga magkadto sa mas malayo nga classrooms.
Suno diri, madasig ang pagsaka sang tubig-baha sa ila lugar nga nagdangat na sa dughan.
Nagkahangawa ini nga kun indi sila mag-evacuate, mahimo nga magsaka pa ang tubig.
Nagpabilin naman ang iya amay sa balay, nga gilayon man nga nagpahibalo sa ila sang nagkulpa na ang baha.
