Ginpahayag sang Pinay sa Israel nga matawhay na sa nasambit nga pungsod nga daw kaangay wala lamang sang natabo.
Sa interview sang Bombo Radyo Bacolod kay Lina Diamante, Bombo International News Correspondent sa Israel nagbalik ini liwat sa pungsod Israel bangud didto na ang iya nga palangabuhian apisar sang mga nagakatabo sa nasambit nga pungsod.
Suno kay Diamante, ang mga Filipino sa Israel ang may madamo nga benepisyo kaangay lamang sang annual leave credits.
Ginpahayag man sini nga wala sila ginapabay-an sang gobyerno sang Israel.
Samtang ginpahayag man sini nga kilala niya si Leah Mosquera ang 49 anyos nga Filipina caregiver nga residente sang Barangay Guintoliran, San Enrique, Negros Occidental bangud abyan sini ang utod sang napatay nga si Joy.
Madugay naman nga wala sila nakakitaay bangud malayo ang ila ginatrabahuan.
Sa nabaton nga impormasyon ni Diamante, si Leah ang yara sa gwa sang shelter sang natabo ang air strike sang Iran kag possible nga naalangan ini sa pagpanago gilayon sa bomb shelters gani naigo ini kag nakaangkon sang patal nga pilas.
Sa karun malinong na ang Israel kag padayon ang klase sang mga estudyante kag ang ila nga mga trabaho.
Panugyan sini sa mga pamilya sang mga OFW nga tawgan ang mga himata nga yara mismo sa Israel kag ini ang ila patihan kag indi ang mga nagwa nga mga fake news kaangay sang sirado ang airport sang Israel bangud wala ini sang kamatuoran.
