Gindeklarar ni Bacolod City Mayor Greg Gasataya ang suspension sang klase sa tanan nga lebel, pampubliko man ukon pribado sa idalom sang Executive Order No. 16 series of 2025.
Ini kasunod sang heavy rainfall warning nga ginpagwa sang PAGASA, tuga sang Tropical Cyclone Crising kag Southwest Monsoon.
Sarang naman makapadayun sa klase ang mga pribado nga eskwelahan nga nagapatuman sang asynchronous kag online classes.
Suspendido man ang klase sa tanan nga level, sa pampubliko kag pribado nga eskwelahan sa Himamaylan City subong nga adlaw.
Sa Executive Order No. 2025-38 series of 2025, sa weather forecast subong nga adlaw, lauman ang madamol nga ulan sa Negros Occidental bangod sa Bagyo.
Bangod sini, suspendido ang face-to-face classes kasubong man ang pagreport sang mga teaching kag non-teaching personnel sa eskwelahan.
Apang apisar sa suspendido ang face-to-face classes, ang mga manunudlo ang mahimo magshift sa alternative delivery mode kaangay sang modular ukon online learning.
Nagsuspender man sang klase ang banwa sang Isabela subong nga adlaw.
Sa Executive Order No 15 series of 2025, suspendido ang klase sa tanan nga level (public ukon private) kasubong man ang pagreport sang mga teaching and non-teaching personnel sa eskwelahan subong nga adlaw until further notice.
Duha ka adlaw naman nga suspendido ang klase sa banwa sang Binalbagan.
Sa facebook post ni Binalbagan Vice Mayor Mary Ann Mirasol, suspendido ang klase sa tanan nga levels, public man ukon private halin Hulyo 17 tubtob sa Hulyo 18.
Ini bangod sa Orange Rainfall Warning, nga nagapatimaan sang mabaskog nga pag-ulan sa probinsya sa masunod nga mga inoras.
Panugyan sini sa mga Binalbaganon nga maghalong karun nga malain ang tiyempo.
Nagdeklarar man sang class suspension para subong nga adlaw ang La Castellana, Hinigaran, Cauayan, Hinobaan, Kabankalan City, Bago City, Pulupandan, Pontevedra, Valladolid, La Carlota City, Silay City kag Ilog City.
Subong tubtob bwas naman ang suspension of classes sa Talisay City, Sipalay City kag sa banwa sang Calatrava.
