Wasak ang isa ka SUV matapos nga nakabunggo sa railings kag nagsaka sa sidewalk sa atubang sang Bacolod San Sebastian Cathedral kaina sang kaagahon.
Interview sang Bombo Radyo Bacolod kay Police Major Elmer Bonilla, Traffic Management Unit head sang Bacolod City Police Office
For video, please clink link: https://www.facebook.com/reel/1039508614834396
Ang driver sang salakyan ang ginkilala lamang nga si Alyas Adrian, 30 anyos, residente sang Barangay Handumanan kag si Alyas Hannah, 30 anyos, residente sang Barangay 36, Bacolod City, nga gina-alegar ex-couple.
Sa interview sang Bombo Radyo Bacolod kay Police Major Elmer Bonilla, Traffic Management Unit head sang Bacolod City Police Office, ginpahayag sang mga nakakita nga mahinay pa ang dalagan sang MG ZS nga salakyan sang magliko sa La Consolacion College, apang hinali na lamang nga nagdasig ang dalagan.
Didto na kag hinali nga nagwarik ang salakyan kag nagdasok sa footwalk sa atubang sang simbahan kag nagtaklas sa railings ang pihak nga bahin sang salakyan.
Naguluwa man ang makina sang salakyan bangod sa impact.
Suno sa traffic investigator, ang duha ang gikan sa Villa Angela Subdivision, sa Brgy Villamonte kag idul-ong na kuntani sang lalaki ang iya ex-girlfriend.
Apang gina-alegar nga nag-away ang duha, kag suno sa driver, gin-agaw sang babayi ang manubela gani sila ang naaksidente.
Ang lalaki ang nakaangkon sang minor injuries, samtang ang babayi ang gindala naman sa isa ka pribado nga ospital.
Suno kay Bonilla, ginatsekyar pa ang damage to property, ilabi na nga vintage ang ginagamit sang simbahan sa ila pasilidad, nga mahimo pabayaran sa driver.
Maswerte naman nga nakaluwas si Violeta Tupas, nga masami nagatulog sa lugar.
Suno diri, wala lamang dugay sang ginhimos sini ang iya hiligdaan kag nagbangon, sang natabo ang aksidente.
