Ginapakamaayo ni Negros Occidental Provincial Consultant for Energy former Governor Rafael “Lito” Coscolluela nga sa isa lamang ka pungku-anay, madamo sila sang nahatagan sang solusyon sa problema sang pagbaha sa Bacolod City.
Ini kasunod sang pag-atubang ni Coscolluela kay Bacolod City Mayor Greg Gasataya agud maghatag sang mga rekomendasyon santo sa nangin assessment sang Anti-Baha Alliance.
Upod nila sa meeting ang iban pa nga mga opisyales sang mga departamento kag opisina sa Bacolod City partikulara na ang Department of Public Works and Highways.
Suno diri, bisan ang iya balay ang nalab-ot sang baha, nga ginakabig sini nga ikaduha sa pinakamalala nga pagbaha sa ila lugar.
Sa assessment, nakita man nila ang rasun sang mga problema, kag ini ang naghatag sang pila ka rekomendasyon.
Una diri ang massive clearing, nga nasuguran na ni Mayor Greg.
Apang suno kay Coscolluela ini ang kinahanglan nga mahimuan sang nagakaigo nga programa
Ikaduha nila nga rekomendasyon amo ang Solid Waste Management Masterplan.
Suno diri, may-ara na sadto sang ginapatuman nga waste seggregation measures agud mabuhinan ang igahaboy sa sanitary landfill.
Apang bisan nabahin-bahin na sang mga tagbalay ang basura, pagkuha sang garbage collector ini ang ginatingob lamang kag dulungan gihapon nga ginahaboy, gani wala sang pulos ang effort.
Ang nasambitan nga concern ang ginkonsiderar man sang city government.
Kag ang ikatatlo nga rekomendasyon amo ang Quality Assurance.
Suno diri, naga-ugtas ang iya adviser nga engineer sadto sa Saudi bangod madamo sang nakita nga drainage project sa Bacolod nga indi pasado sa standard kaangay sang indi level ukon kabos nga pagtakod sang mga tamburong.
Pahayag sini nga sa drainage masterplan dapat nga ginakonsiderar ang volume sang tubig nga magalabay, kag ini ang estimated capacity ang 70% lamang sang output agud nga may allowance pa inkaso magdako ang volume.
Sa baylo, sa Bacolod City, indi na masarangan sang drainage system ang volume sang tubig gani naga-alalawas.
Giapakamaayo naman sini nga nagsumiter na ang DPWH sang proposal sa paghimo sang bag-o nga drainage masterplan, para sa long term measure.
Samtang ginpahanumdom man sini nga matuod nga nagataas ang sea water level.
Gani dapat nga may-ara na sang infrastructure management guidelines sa mga flood prone areas, nga mahatagan sang elevation ang mga propedad.
