Bwas ukon sa Sabado pa ginlantaw sang Office of the Civil Defense – Negros Island Region Director mahimo makapauli ang mga evacuees gikan sa 4km tubtob 6km extended danger zone sang Bulkan Kanlaon.
Sa interview sang Bombo Radyo Bacolod kay OCD-NIR Director Donato Sermeno III, sa pagpanaog sang Alert Status sa Level 2 gikan sa anay Level 3, sarang na nga makapauli ang mga gin-evacuate nga gikan sa extended danger zones.
Apang bangod sa kadamuon sang internally displaced persons (IDPs), kinahanglan nga mangin organisado ang pagpapauli.
Gani sila ang nagameeting pa upod sa local government units nga apektado kag sa ila tagsa ka local Disaster Risk Reduction and Management Councils, sa pagpatuman sang mga orientation.
Suno diri, kinahanglan nga mahatagan sang mga pahanumdom ang mga evacuees sa dapat nga himuon inkaso liwat nga magsaka ang alert status ukon kung mag-alburuto ang Bulkan.
Kasubong man nga ila pa nga diskusyonan ang ipabalon sa mga evacuees kaangay sang foodpacks.
Bangod nakapatigayon na sang una nga decamping sang mga evacuees sa Barangay Cabagnaan, La Castellana, ginalantaw nga kaangay nga proseso ang himuon para sa pagpapauli sang mga pumuluyo.
Sa paghinun-anon sini sa Incident Management Team kag La Castellana DRRMO, ginalantaw nga bwas ukon sa Agosto 2 pa makapauli ang mga residente.
Sa Regional Interagency Coordination Council Meeting, na-estoryahan man ang paghatag sang psychological intervention sang Department of Social Welfare and Development para sa mga IDPs.
Sila ang nagdraft naman sang Kanlaon Recovery Disaster Plan, nga pamunuan sang Task Force Kanlaon.
Kabahin diri ang pagbakal sang duta agud mangin relocation site sang mga nagapuyo sa sulod sang 4km radius gikan sa crater sang Bulkan.
Sila ang nagtukod man sang Technical Working Group nga amo ang nagatsekyar sa mga duta kun ini ang safe sa hazzard kag malayo sa kahalitan sang paglupok sang Bulkan Kanlaon.
Pahanumdom ni Sermeno nga may posibilidad gihapon nga magsaka sa Alert Level 3 ang status sang Bulkan.
