Ginpanginwala ni anay Bacolod City – Office of the Building Official Officer in Charge Engr Isidro Sun Jr ang alegasyon nga nagpangilkil siya sa nagkuha sang business permit.
Madumduman nga ginserbehan sang show cause order si Sun sa gina-alegar nga may ginsugo ini nga isa ka empleyado sang OBO nga i-approve ang business permit application sang isa ka establishemento apisar nga wala sang issued Certificate of Occupancy.
Gina-alegar nga nangayo sang P13,000 si Sun para sa application apang nakasugtan nga P11,000 nalang ang ibayad sa iya kabaylo sa release sang Occupancy permit.
Sa interview sang Bombo Radyo kay Sun, iya ginapanginwala ang alegasyon batok sa iya kag wala sang kamatooran nga nagbaton siya sang P11,000 para sa release sang Occupancy permit.
Suno diri, wala lang man sang may nagpahibalo sa iya kag iya na lamang ginkakibot nga ginpakahuy-an ang iya pangalan.
Nagpasalig naman ini nga sabton niya ang mga alegasyon batok sa iya. Samtang…ginklaro ni Bacolod City Legal Officer Atty. Chiu nga wala sang pamulitika sa pagdagdag sang show cause order si former Office of the Building Official Officer In Charge Engr Isidro Sun Jr.
Suno kay Chiu, nagabaton sila sang reklamo kag ila lamang ini ginahatagan sang insakto nga tikang.
Suno diri, sabton lamang ni Sun ang show cause order kag wala diri sang personalay.
Dugang pa sini, dapat iimprove ang imahe sang OBO bango malain na gid ang panan-aw sang mga tawo sa trabaho sang opisina.
Pahayag ni Chiu, ginahulat lamang nila kun ma-issue si Bacolod City Mayor Greg Gasataya sang formal charge ukon i-dismiss ang kaso.
