Padayon ang pagreview sa mga on-going drainage project sa ciudad sang Bacolod.
Suno kay City Administrator Atty Mark Mayo, ginareview sang Contract Termination Committee ang existing nga mga project sa ciudad.
Suno diri, may yara sang duha ka drainage project nga ginareview, isa diri amo ang proyekto sa Purok Nanca, Brgy 3 nga may yara sang P11 million nga budget.
Ang kontrata na-expire na sang Abril kag ang construction gin-umpisahan sang Agosto tinalikdan nga tuig.
Nangayo sang extension ang contractor apang ini ang diskusyonan pa agud mahibaluan kun ano ang mangin konsekwensya diri nga mahimo ma-blacklist ang contractor ukon materminate ang proyekto ukon may yara sang multa.
Samtang ang rason naman nga wala natapos ang proyekto amo nga bangod sa malain nga tiyempo apang suno kay Mayo indi ini mabaton nga rason.
Samtang, ang isa pa gid ka proyekto nga ginareview amo ang drainage project sa Palanca St. nga expired man ang kontrata apang nakapangayo ini sang extension sadtong si Bacolod City Lone District Congressman Alfredo Benitez pa ang nagapungko bilang alkalde sang ciudad.
Sa karun nangayo ang contractor sang apat pa gid ka bulan nga extension kay Bacolod City Greg Gasataya.
Ang rason naman sa delay sa construction sa Palanca St. amo nga may yara sang adjustments kag conflicts sa tubo sang Primewater kag may yara sang pagbag-o sa outfall sang drainage samtang wala pa naga-operate ang diversion channel.
