I-verify pa sang Commission on Elections – Bacolod kun matuod nga ginpa-require sa mga estudyante ang pagparehistro agud mahatagan sang clearance para makagradwar.
Ang 10-day voter’s registration para sa Barangay and Sangguniang Kabataan Elections ang nag-umpisa sang Agosto 1 kag nagtakop kahapon, Agosto 10.
Sa kabug-usan, halos 98 percent sa mga nagparehistro ang mga pamatan-on nga naga-edad sang 15 tubtob 20 anyos.
Sa interview sang Bombo Radyo Bacolod kay Bacolod City Election Officer Atty. Katrina Trinio Caña, i-verify pa nila kun matuod nga gin-require ang mga estudyante nga magparehistro para sa clearance sa graduation.
Suno diri, kun gina-require ini sa mga estudyante, napilitan ang mga ini nga magpila kag maghulat sang madugay agud maka-comply sa ila nga buluthuan.
Pahayag ni Caña, gina-encourage ang mga kabataan nga magparehistro apang kaangay nga indi naman manami nga i-require ini sa bata nga kun indi sila maka-comply indi sila paghatagan sang clearance para sa graduation.
