Mas nagbaskog pa ang Typhoon GORIO karun nga ini ang nagahilapit na sa Eastern Coast sang Southern Taiwan.
Sa karun, ginpaidalom na sa Tropical Cyclone Wind Signal no. 2 ang Itbayat, Batanes; samtang yara naman sa Tropical Cyclone Wind Signal no. 1 ang nabilin nga bahin sang probinsya.
As of alas-5:00 subong nga aga, ang sentro sang Typhoon GORIO ang ulihi nga nasiplatan sa 165 km Northeast sang Itbayat, Batanes.
Dala sini ang kabaskugon sang hangin nga nagadangat sa 140 km/h kag pagmadlos nga tubtob 170 km/h, samtang ini ang nagahulag sa West Northwestward nga dereksyon sa kadasigon nga 25 km/h.
Sa atun latest track kag intensity forecast, magapadayun lamang sa banas ang Bagyo kag ini ang ginalantaw nga magalandfall sa eastern coast sang Southern Taiwan subong nga adlaw.
Samtang ginalauman naman nga maggwa sa Philippine Area of Responsibility (PAR) ang Bagyo GORIO karun sa hapon ukon sa gab-i.
Ginalantaw man nga ini ang mapabilin sa Typhoon category antes ang paglandfall sa Taiwan, antes amat-amat nga magahuyang.
Lauman ang mabaskog nga mga pag-ulan nga may kaupod nga mabaskog nga huyop sang hangin sa Batanes, tuga sang Typhoon GORIO.
Mangin magal-umon man ang kalangitan, nga makatuga sang lapnagon nga mga pag-ulan sa Ilocos Norte, Apayao, kag Cagayan bangod gihapon sa Bagyo.
Samtang makabatyag man sang lapta-lapta nga mga pag-ulan nga kun kis-a may kaupod nga pagpangilat kag pagpanaguob sa MIMAROPA, Western Visayas, Negros Island Region, Zamboanga Peninsula, BARMM, SOCCSKSARGEN, Camarines Sur, Catanduanes, Albay, Sorsogon, kag Masbate bangod naman sa Southwest Monsoon ukon Hangin Habagat.
Samtang mangin makanay naman ang panahon sa nabilin pa nga bahin sang pungsod lakip na sa Metro Manila, magluwas sa mga gulpyada kag makadali nga mga pag-ulan dala sang Localized Thunderstorms.
