Natukiban nga may pending warrant of arrest ang lalaki nga nadakpan sa drug buybust operation sa Purok Acacia, Barangay Felisa, Bacolod City alas-6:30 kagab-i.
Ang subject ang ginkilala nga si Francis Besenia, 34 anyos, kasado, wala sang trabaho, may duha ka kabataan, kag residente sa Purok Saturn, Phase 6B, Barangay Handumanan, Bacolod City.
Sa interview sang Bombo Radyo Bacolod kay Police Captain Glen Montaño, station commander sang Bacolod Police Station 10, narecover sa suspect ang duha ka gramos sang suspected shabu nga may market value nga P13,600.
Sa ila imbestigasyon, natumod nga may pending warrant of arrest ang suspect sa kaso nga frustrated homicide nga nakumiter sa Barangay Minoro, Sta. Cruz, Murcia sang 2010.
Suno sa station commander, ang source sang suspect sang illegal nga droga ang gikan sa Brgy 2 kg Brgy Banago.
Samtang ang masami sini nga parokyano amo ang mga tricycle drivers sa Brgy Felisa kag Handumanan.
Ang suspect ang nagasideline man kun kis-a nga driver sang e-bike kag nagabulubaligya sang bisan ano nga sarang makwartahan.
