Tuyo ni Bacolod City Mayor Greg Gasataya nga mabutangan sang QR Code ang tanan nga mga City Funded Projects para sa transparency.
Sa interview kay Mayor Greg, ginmanduan na sini ang Management Information Technology and Computer Services (MITCS) sa paghimo sang QR Codes.
Sa QR Code makita ang title sang proyekto, duration kun san-o ginsuguran kag san-o dapat matapos, pila ang budget, kag kun sin-o ang engineer incharge.
Pinaagi sini, mas mangin transparent para sa publiko ang proyekto, kag matsekyar sang mga pumuluyo ang status sini.
Suno kay Mayor Greg, bisan may-ara sang nakapaskil nga mga karatola nahanungod sa mga proyekto, kun kis-a ini ang indi naman mabasahan.
Samtang ang mga detalye sa QR Code ang sarang man nga magamit kun may-ara sang mga complaints ukon makita nga violations.
Apang paathag ni Mayor Greg nga ang City Funded Projects lamang ukon ang mga National-funded apang ang ciudad ang naga-implementar, ang sarang malakip sa QR Code scheme.
Sa mga National projects naman nga gina-implementar sang iban nga ahensya sang gobyerno, ginahatag na sang alkalde ang papel sa nasambitan nga mga ahensya sa pagtrack sang ila mga proyekto.
