Halos 60,000 kilos sang basura na ang nakolekta sang Bacolod City Government gikan sa clearing operation sa tatlo ka creek sa ciudad.
Sa interview sang Bombo Radyo Bacolod kay City Administrator Atty Mark Steven Mayo, ang nakolekta nga 59,855 kilos sang basura ang gikan sa clearing operations nga gin-umpisahan sa Mambulok Creek sang Hulyo 9, kag ginsundan sang Banago Creek kag sa bahin sang Barangay Bata.
Pasalig ni Mayo nga ipadayun nila ang aktibidad kag ang ginalantaw nga sunod nga tinluan amo ang Mandalagan Creek.
Apang suno diri, nakabatun sila sang report nga amat-amat naman nga nagatipon ang basura sa Mambulok Creek.
Pahayag sini nga agud masustiner ang tayuyon nga pag-ilig sang waterways nga makapanubo sang tyansa sang pagbaha, kinahanglan na sang enforcement sang Republic Act 9003 ukon Ecological Solid Waste Management Act of 2000 kag anti-littering ordinance sang Bacolod City Government.
Nagpatawag na ang mga ini sang Solid Waste Coordination Meeting kaupod ang mga Barangay kag Sangguniang Kabataan officials partikular na ang mga chairman sang Committee on Environment sa Barangay council.
Suno kay Mayo, sila ang hatagan sang ila tagsa ka function sa pagmintinar sang mga water ways bangod aminado ini nga ang Barangay amo ang pinakamalapit kag best entity nga sarang makabantay.
Ini ang sa idalom gihapon sang Bacolod Environment and Natural Resources Office kag Bacolod City Legal Office.
Gina-echo man sini ang pahayag ni Mayor Greg Gasataya nga responsibilidad sang tanan ang pagtipig sa dunang manggad.
Pahanumdom sini nga indi masarangan sang City Government kun sila lamang ang nagahulag, gani kinahanglan gid ang collective effort sang mga pumuluyo.
