Nagpasar sang resolusyon ang Sangguniang Panlungsod sa Bacolod City nga nagapanawagan sa kapulisan nga pasanyugon pa ang operasyon batok sa illegal gambling partikular na ang Small Town Lottery (STL).
Sa interview sang Bombo Radyo Bacolod kay Councilor Dindo Ramos, author sang resolusyon, madamo ini sang makita sa ciudad sang Bacolod nga mga bet collectors sang STL.
Pahanumdom sang konsehal nga sa Negros Occidental lamang may franchise kag nakaproseso sang business permit ang STL kag wala sa Bacolod City.
Gani makonsiderar nga illegal ang pagpataya sa STL sa ciudad apisar pa nga naka-uniporme ukon may ID ang bet collectors.
Suno kay Ramos, tubtob sa mga ciudad kag banwa lamang nga sakop sang Negros Occidental Provincial Government sarang maka-operar ang STL, bangod sila ang sa probinsya nagabayad sang tax.
Kun luyag sang mga ini nga maka-operar sa Bacolod City, sila ang kinahanglan nga mag-apply sang business permit kag prangkisa, apang ini ang magakinahanglan pa sang Resolution Of No Objection (RONO sa SP) gani nakadepende pa sa mga konsehal kun sila ang matugutan.
Aminado si Ramos, nga indi man sini luyag nga madakop ang mga nagapataya sang STL bangod nakahibalo ini nga sila ang nagapangabuhi lamang, apang kinahanglan nga matapna ang makabig illegal nga sugal.
