Panawagan sang convenor sang Amlig Tubig nga dapat magpatigayon gilayon sang financial kag administrative audit sa Bacolod City Water District matapos ang pag-ilis kay General Manager Mona Dia Jardin.
Sa interview sang Bombo Radyo Bacolod kay Councilor Wilson Jun Gamboa, ginapasalamat sini nga nakakas na sa BACIWA si Jardin, nga suno sa iya nagalipot kag nagapugong sa mga konsumedor nga mahibaluan kun ano ang matuod nga nagakatabo sa sulod.
Nagapati ini nga madamo sang matukiban, ilabi na nga ginahimo gatasan ukon ginasuyupan sang anay Board of Directors kag General Manager ang BACIWA.
Suno kay Gamboa, amat-amat na nga nagkaladula sa BACIWA ang mga anay nagduso sang Joint Venture Agreement sa PrimeWater, gani nagalaom man ini nga may amat-amat naman nga reporma.
Panindugan ni Gamboa nga umpisa pa lamang nagapamatok na ang Amlig Tubig sa JVA bangod nakita nila nga tuman ka disbentaha ang kontrata.
Dugang pa sini nga sadto nagadangat sa P80 million tubtob P100 million ang net income sang BACIWA kada tuig, apang sa pagsulod sang PrimeWater, yara na lamang sa P15 million ang ginahatag nila sa ciudad.
Sa P1.6 billion nga ginpromisa nga investment, P113 milion lamang ang nakita sa mga dokumento nga napatupa, kag ini ang gikan pa sa sinuktan sa mga konsumedor ukon koleksyon sa nakaligad nga lima ka tuig.
Ginakahangawa ni Gamboa nga ang 25 years renewable JVA, ang napangutangan na sang PrimeWater sa iban nga mga bangko ukon financial institution.
Suno diri, sadto sa P2.5 billion nga ginpahayag kinahanglan para makay-o ang performance sang BACIWA, nagtanyag ang Department of Budget and Management nga sila ang sarang magpa-utang sang tubtob sa P78 billion.
Ini bangod nakita nga may ikasarang nga magbayad ang BACIWA, kag wala sang piyerde sa water distribution nga negosyo.
