Gin-athag sang Protected Area Superintendent sang Mt Kanlaon Natural Park nga ginapahanugotan ang paghawan sa Tamburong creek sa Brgy Biak na Bato, La Castellana, Negros Occidental basta indi pag-itransport ang volcanic materials sa gwa sang Mt Kanlaon Natural Park.
Sa interview sang Bombo Radyo kay Forester Philip Lechoncito, may yara na sang resolusyon nga gindihon sang August 11 para sa dredging activity nga patigayonon sa sapa kag mahimo nga ma-transport ang volcanic materials sa gwa sang Mt Kanlaon Natural Park para magamit sang Local Government Unit sa proyekto.
Suno diri, na-endorso na ang resolusyon sa Protected Area Management Board (PAMB) members kag ginahulat na lang ang pagpatigayon sang assessment sang Mines and Geosciences Bureau (MGB) para mahibaluan kun pila ang volume sang volcanic materials sa sapa.
Dapat may yara man sang letter of intent halin sa LGU antes ipasa sa Office of the Secretary sang Department of Environment and Natural Resources (DENR) agud makakuha sang permit para sa dredging activity.
Pa-athag ni Lechoncito, sang Marso may yara na sang resolusyon nga naga-aprubar sa paghawan sa sapa apang wala sang volcanic materials nga i-transport sa gwa sang Mt Kanlaon Natural Park kag gamiton sa personal nga benepisyo.
