Nahawanan na ang dalan sa Brgy 4, Sipalay City, Negros Occidental kasunod sa nagluntad nga landslide.
Sa interview sang Bombo Radyo kay Dionilo Bogtae, executive assistant for operations sa ciudad sang Sipalay City, kaina kapin alas- 6:00 sang aga may nagluntad nga landslide sa Brgy 4 kun sa diin naulamid ang isa ka poste sang telecommunications company nga natumba.
Suno diri, wala naman sang may nagluntad nga brown out sa lugar.
Dugang pa sini, kagab-i may ginpang-evacuate naman nga residente nga nagapuyo malapit sa Sipalay river sa Brgy Mambaroto bangod sa madamol nga pag-ulan kag pagluntad sang landslide.
Kaina naman sang kaagahon, may yara man sang gin-evacuate sa bahin sang Brgy Gil Montilla.
Sa karun masobra sa 100 tanan ka indibidwal ang yara sa evacuation center.
