Padayun pa ang panawagan sang kapulisan sang Talisay City sa mga pamilya nga may missing nga himata matapos makit-an ang duha ka nagaka-agnas nga bangkay sa hilamonan nga bahin sang parking area sang First Farmers Holding Corporation kapin alas-6:00 kagab-i.
Nahibaluan nga ang duha ka nagaka-agnas nga bangkay ang nakit-an sang mga kabataan nga nagsulod sa compound.
Sa interview sang Bombo Radyo Bacolod kay Police Lt. Col. Arthur Baybayan, hepe sang Talisay City Police Station, mabudlay na nga makilala ang identity sang mga bangkay bangod yara na sa adlvance stage of decomposition kag gina-uludan na.
Gincheck naman nila ang records sang mga missing individuals, apang sa karun wala pa sang development.
Nagakoordinar man sila sa tagsa ka Barangay sang ciudad kasubong man sa mga kaingod nga banwa kag ciudad kun may-ara sang missing individuals nga mahimo amo ang nasapwan.
Padayun man ang ila interviews sa mga pumuluyo sa palibot kag sa posible witness, kag pasalig ni Baybayan nga maid-id nila nga imbestigaran ang kaso.
Ginahulat paman nila ang resulta sang post mortem examination kun may-ara sang mga palatandaan nga mahimo magamit sa pag-identify sa mga biktima.// May narecover naman nga isa ka live ammunition ukon wala pa napalupok nga bala malapit sa isa sa mga bangkay.
Isa sa bangkay ang nagasuksok sang itom nga bayo, denim short, Lacoste-brand nga underwear kag knitted nga sling bag; samtang ang isa ang wala sang pang-ibabaw nga panapton kag nakadenim shorts man.
Nahibaluan nga ini na ang ika-lima nga bangkay nga nasapwan sa Talisay City subong nga bulan.
Duha ang nasapwan sa Barangay Concepcion, nga nakilala nga sanday Mars Relles nga residente sang Brgy Estefania, Bacolod City kag Alyas Koykoy nga residente naman sang banwa sang San Enrique sang Agosto 11.
Samtang sa kaangay nga adlaw, nasapwan man ang nagaka-agnas nga bangkay sa Barangay Matab-ang, nga tubtob sa karun wala paman makilala.
Sa pihak sini, pasalig ni Baybayan nga isolated ang kaso, kag nagapabilin nga malinong ang Talisay City.
