Linibo ka mga sako sang semento ang natukiban nga nagtilig-a na sa warehouse sang City Engineers Office.
Ini ang gintsekyar mismo ni Bacolod City Mayor Greg Gasataya kaina sang aga.
Sa interview sa alkalde, nagdangat sa masobra 4,600 ang sako sang semento ang indi na mapuslan, kag kalabanan sa mga nagtig-a amo ang mga yara sa idalom.
Pahayag sang alkalde nga siya ang nagpatukod sang inventory team gikan sa City Internal Audit, General Services Office kag City Engineer’s Office, agud tsyekyaron ang mga stocks kag supplies sa warehouse sang City Engineer’s Office bilang preparasyon karun nga nagapadulong na sa budget season.
Natukiban ang linibo nga nagtig-a nga semento kagab-i kag gilayon nga ginreport kay Mayor Greg.
Natumod nga 12,000 bags sang semento ang nakatambak sa lugar.
Nagalaom ang alkalde nga mahatag sa iya sa Lunes ang mga report tuhoy sa systema nga ginapatuman sa pagpasulod kag pagwa sang supplies, san-o ginprocure kag kun ano ang intended purpose.
Pa-imbestigahan man sini ang rasun nga naresulta sa pagtig-a sang tuman ka damo nga semento.
Suno diri, may lainlain nga bodega ang City Engineers Office kag nagalinapta man ang ginabutangan sang mga supplies.
Aminado ini nga may ginatukod nga dako nga bodega sa BREDCO Port agud mabutang na lamang sa isa ka lugar ang mga construction materials kag supplies, apang sa karun kinahanglan nila masolusyonan ang problema.
Sa iya nga facebook post, gintawag ni Mayor Greg ang natabo nga insulto para sa mga taxpayers.
Nagmando man ini sang massive clean-up bangod sa nakita nga naganilapta kag indi organisado nga mga bodega.
