Ginpahayag ni Bacolod City Engineers Office Head Engr Loben Ceballos nga indi malikawan ang damages sa mga supplies sa sitwasyon sang ila warehouse.
Sa interview sang Bombo Radyo Bacolod kay Ceballos, gikan sa daan nga bodega ang ginbutang nga mga sako sang semento sa warehouse sa Barangay Taculing.
Hungod naman nila nga ginbanig sa idalom ang nagtig-a na nga sako sang semento, apang aminado ini nga madamo sang iban pa nga nagtig-a man, nga nagdangat sa masobra 4,600 ka sako.
Ini ang resulta man sang tuman ka damo nga supplies sa bodega nga nagalab-t sa masobra 12,000 ka sako.
Dugang pa ni Ceballos nga indi malikawan ang mga damages sa stock pile ilabi na nga lainlain ang ila mga bodega kag ginakulang pa sang tawo.
Pasalig niya nga pangitaan nila sang iban nga magamitan ang mga nagtig-a nga semento, bangod ini ang indi nila basta mahaboy na lamang kag ma-usik ang budget.
Ginpasalig niya nga may ginaconstruct na nga dako nga warehouse sa BREDCO, nga may kalaparun nga 1,600 square meter, kaupod na ang opisina sa balor nga P67 million.
Suno kay Ceballos, bangod ini ang malapad, ang propidad ang sarang pa nga maparentahan sa iban.
Dugang pa sini nga indi na sila magkaproblema sa lapta-lapta nga supplies bangod matingob na sa isa ka warehouse ang semento, bato, balas, kabilya kag iban pa nga construction materials.
Kabug-usan nga 7,000 square meters nga duta ang ginadevelop, bangod luwas sa City Engineers Office, diri man igahamtang ang General Services Office kag may-ara man sang ginaconstruct nga motorpool.
Ang construction ang nag-umpisa sang Nobyembre 2024, kag sa karun 20 percent na ang nahuman.
