Ginpahayag sang Bacolod City Police Office Director nga legal ang Small Town Lottery (STL) sa Bacolod City suno sa kumpirmasyon sang Philippine Charity Sweepstakes Office (PCSO) – Bacolod City.
Ini ang suli sa panindugan sang pila ka mga konsehal nga wala sang na-issue nga business permit para sa STL operation.
Sa interview sang Bombo Radyo Bacolod kay BCPO Director Police Col. Joeresty Coronica, agud matumod kun illegal gid man ang pagpataya sang STL sa ciudad, nagdangop ini sa PCSO – Bacolod kag nakumpirmar nga may otorisasyon gikan sa ahensya ang operasyon.
Ini ang separado man sa STL operation authority nga ginhatag sa Negros Occidental.
Madumduman nga nagpanawagan ang konseho sa BCPO nga pasanyugon ang operasyon batok sa mga illegal STL operation bangod suno sa ila sa Negros Occidental lamang may-ara sang permit para diri.
Natuhoy sa legality, ginatugyan na lamang ni Coronica sa pagsabat ang PCSO-Bacolod.
Sa pihak sini, pasalig sang BCPO nga padayun man ang ila operasyon batok sa mga bookies nga nagapataya sang STL, kun sa diin sila ang may nagakadakpan sa halos kada semana.
