Nagalaom ang pinuno sang City Social Welfare and Development Office sang ciudad sang Talisay nga mahatagan pagtamod sang regional office sang DSWD ang mga badjao nga nagabalik-balik sa probinsya sang Negros Occidental apisar nga makapila ka beses na nga ginpapletehan agud makapauli sa ila mga probinsya sa Mindanao.
Suno kay Dionela Madrona, sa karun nga nagasaulog ang Talisay City sang Minuluan Festival, madamo ang presensya sang mga badjao nga nagapangayo-ngayo sa ciudad.
Nagatinir ang mga ini sa kilid sang public market kun sa diin sang damlag lang, nalabyan sang Bombo News Team nga nakahilira ang mga ini agud magtulog.
Suno kay Madrona, nakatukod na sila sang task force agud magmonitor kag magpahalin sa mga nagapangayo-ngayo nga mga badjao sa mga dalanon kag mga balaligyaan sa Talisay.
Suno diri, makapila ka beses na nila ini nga gin-endorso sa Provincial Social Welfare and Development Office kag sang damlag lang, ila na ginmeetingan agud mahatagan sang endorsement sa regional office.
Suno sa iya, makapila ka beses na nga ginpapletehan kag ginhatagan ang mga ini sang family food packs agud makapauli apang nagabalik gihapon diri sa probinsya.
Nagalaom si Madrona nga mahimuan ini sang tikang sang regional office bangud indi lamang ini problema diri sa local.
