Ginmando ang pagsuksok anay sang civilian attire sang mga empleyado sang Department of Public Works and Highways (DPWH).
Sa interview sang Bombo Radyo Bacolod kay DPWH – Negros Island Region Assistant Regional Director Engr. Rodney Gustilo, nabatun nila ang memo ni DPWH Secretary Vince Dizon sang Setyembre 9, nga nagasuspend sa pagsuksok sang DPWH precribed uniform.
Ini bangod sa malain nga public perception, nga mahimo makabutang sa risgo sa mga DPWH employees nga maharras.
Suno kay Gustilo, bangod sa kahimuan sang pila ka mga DPWH officials nga pangurakot, partikular na sa Bulacan kag iban pa nga bahin sang Luzon, ang ginapakamalaon amo ang kabug-usan nga ahensya.
Suno diri, madamo sang mga DPWH employees nga nagacommute lamang padulong sa opisina kag mahimo mapa-ukpan sang kaakig sang publiko.
Indi man nila mabasol ang mga pumuluyo nga nag-ibwal ang kaakig bangod sa natumod nga mga kurapsyon nga nag-uyang sa bilyon-bilyon nga pondo sang gobyerno.
Pangabay ni Gustilo nga indi pag-igeneralize bangod natumod naman ang mga involved kag madamo sang mga empleyado sang DPWH nga tampad sa pagserbisyo.
Pasalig sini nga padayun ang imbestigasyon sa tanan nga DPWH offices sa Pilipinas.
Dugang pa sini nga may gintukod naman nga independent commission, nga magahatag sang kasagan.
Sa bahin sang DPWH-NIR, sila ang nagsumiter na sang mga ginpangayo nga dokumento.
Apisar nga indi man tuman ang risgo kag kaakig sang mga pumuluyo diri sa Visayas, nagaserbe gihapon nga pangaman para sa mga DPWH employees ang indi anay pagsuksok sang uniporme sa pagsulod sa trabaho.
