Masobra sa 6,000 ang ginalauman nga magapartisipar sa trillion-peso march sa Setyembre 21 sa pagpabutyag sang pagpamatok sa korapsyon sa gobyerno.
Suno kay Akbayan Negros Spokesperson Noli Rosales, maumpisa sila sa South Road Capitol padulong sa Bacolod City Public Plaza apang bwas may rekorida nga patigayonon agud manawagan sa mga luyag pa gid nga mag-partisipar.
Suno diri, sa luyag mag-upod sa rally magsuksuk sang puti nga tshirt ukon puti nga ribbon.
Gin-athag man sini nga indi sila pro Duterte ukon pro Marcos apang sila nagapanawagan sa accountability sang gobyerno.
Nahanda naman nila ang ila permit kag nangayo na sang assistance halin sa Traffic Management Unit. Samtang, suportado sang pila ka kaparian ang gintukod nga grupo nga Council for Concerned Citizens (C-Three) nga nagapamatok sa mga anomalya sa flood control projects sa ciudad sang Bacolod.
Sa interview sang Bombo Radyo Bacolod kay Fr. Julius Espinosa, director sang Caritas Bacolod Social Action Foundation Incorporated, iya gina-athag nga indi siya ang convenor sang grupo nga gintukod kag gin-imbitar lamang siya.
Suno diri, tuyo sang grupo nga imbestigaran ang sala sa flood control projects sa ciudad.
Suno pa diri, kun malimpyo lang man ang mga opisyales sang Department of Public Works and Highways wala sang rason para manago sila.
Pahayag sini kun nagapati ang mga involved sa anomalous flood control projects nga ginapabay-an lang ila ginahimo, suno kay Espinosa ang grupo nagalantaw kag nagabantay sa ila.
