Gin-endorso sang Sangguniang Panlungsod ang pagbutang sang transport route sa Bacolod-Negros Occidental Economic Highway (BANOCEH) halin sa Barangay Sum-ag lusot sa Cadiz City.
Sa interview sang Bombo Radyo Bacolod kay Councilor Atty Dindo Ramos, chairperson sa Committee on Transportation, apat ka transport route ang ginrequest sang Asenso Bacolod Transport Cooperative apang isa lamang ang gin-aprubahan nila sa konseho.
Ini bangod ang iban nga mga routa ang mahimo makaapekto sa mga nagabyahe nga tricycle.
Suno kay Ramos, wala sang conflict sa pagbutang sang routa nga magakonekta sa Barangay Sum-ag padulong sa Silay City bangod wala man sang transport groups nga nagabyahe sa area.
Naghimo sang favorable endorsement ang SP nga amo ang ginpadala kay Eduardo Asis Jr, chairperson sang kooperatiba, nga iya ipresentar sa Land Transportation Franchising and Regulatory Board (LTFRB).
Suno kay Ramos, sa masami gina-aprubahan man sang LTFRB ang favorable endorsement sang mga local government units.
Ginaplano nga ini ang himuon nga green route, ukon mga electric jeepneys ang magabyahe.
Pinaagi sini, mapahapos ang pagbyahe sang mga gikan sa Southern Negros Occidental nga padulong sa Bacolod-Silay International Airport, subong man sang mga maga-abot sa airport nga magapauli sa sur.
Igapresentar man ni Ramos ang proposal sa alkalde kag mga konsehal sa Cadiz City bangod magakinahanglan man nga magtukod ang terminal sa nasambitan nga ciudad.
Samtang ang tatlo ka nabilin nga transport route request ang ipaidalom pa sa committee hearing agud masettle ang mga konflikto.
