Wala nagakooperar ang mga pumuluyo sa Barangay Dos Hermanas, Talisay City sa imbestigasyon angot sa nasapwan nga nagaka-agnas nga bangkay sang babayi kag lalaki sa parking area sang First Farmers Holding Corporation sang Agosto 29.
Sa interview sang Bombo Radyo Bacolod kay Police Lt Col Alvin Christopher Baybayan, hepe sang Talisay City Police Station, wala gid sila sang makuha nga impormasyon sa area.
Madumduman nga nagaka-agnas na sang masapwan ang lawas sang babayi kag lalaki nga lunsay may mga natumod nga tattoo sa ila lawas.
Suno kay Baybayan, apisar sa mga markings, wala gid sang pamilya nga nagclaim sa mga bangkay, gani sa karun sila ang nagapakig-angot sa Bureau of Jail Management and Penology bangod ang tattoo nga nakita sa lalaki ang link sa grupo sa sulod sang prisuhan.
Ang mga bangkay ang madumduman nga nasapwan sa bahin nga hilamonan apang open field kag may mga balay man sa palibot.
Ginalantaw nga residente lamang sa lugar ang may kahimuan sa krimen kag isa sa mga motibo nga ginatutukan ang posibilidad nga kawatan sang manok ang duka ka biktima.
Apang suno kay Baybayan, mas madasig kuntani mahatagan sang kasanagan ang kaso kung magasugid ang mga pumuluyo nga may nakita ukon nahibaluan tuhoy sa krimen.
