Maidid nga ginpili ang mga kandidata nga magapaindis-indis agud makuha ang korona sang Miss Bacolod MassKara 2025.
Sa interview sang Bombo Radyo Bacolod kay Daniel Banday, pageant director, ginsiguro nga nagsunod sa mga qualifications ang pagpili sang 15 ka mga kandidata nga maga-contest agud makuha ang koronahan nga Miss Bacolod Masskara 2025.
Suno kay Banday ang coronation night ang patigayunon sa Oktubre 12 sa University of St. La Salle – Bacolod City Coliseum.
Suno diri, may yara lamang sang 4,500 ka libre nga general admission para sa coronation night.
Dugang pa sini nga first come, first served ang admission kag may ihatag nga wristband nga may control number sa magapila sa Gate 1 sang USLS.
Nakadepende man sa kandidata kun magapasakop ini sa national pageant apang ang makoronahan nga Miss Bacolod MassKara 2025 ang may yara gid sang tsansa nga makapasundayag sa national pageant competition.
Ginpahayag ni Banday nga kalakip sa mga judges sanday Miss Universe Philippines 2024 Chelsea Manalo, Myrna Esguerra kag John Bonifacio samtang ang iban ang tentative pa.
Gina-agda sang mga ini ang mga Bacolodnon kag Negrense nga saksihan ang coronation sang bag-o nga Miss Bacolod MassKara.
