Ginseguro sang Bacolod City Health Office nga maubos nila gamit ang malapit na mag-expire nga mga anti-rabies vaccine.
Sa interview kay Dr Carlo Ortega, animal bite coordinator sang Bacolod CHO, ang 1,500 vials sang anti-rabies vaccine ang maga-expire sa Nobyembre 30.
Paathag sini nga ang bakuna ang wala ginbakal sang ciudad, sa baylo ini ang ginhatag sang Research Institute for Tropical Medicine (RITM) sang Oktubre 2024.
Pahayag ni Ortega nga 3,000 vials ang gina-offer nga ihatag sang RITM agud ma-ubos nila dispose ang manug-expire na nga bakuna, apang 1,500 vials lamang ang ila nga ginbatun.
Pasalig naman sini nga ma-ubos nila hatag ang mga bakuna antes mag-expire.
Sa pagpadulong sang Bombo News Team sa Bacolod CHO kaina, tuman ka damo sang mga nagapila para magpabakuna.
Aminado si Ortega nga indi nila masarangan ang kadamuon sang nagapila agud magpabakuna gani nagset lamang sila sang 100 sa aga, kag ginadugangan sang kapin 50 sa hapon.
Suno diri, limitado lamang ang ila mga nurses kag doktor, kag may iban pa nga ginacater sa hapon kaangay sa paghatag sang medical kag death certificates kag sila man ang nagaphysical checkup sa mga persons deprived of liberty (PDL) antes dal-on sa Bureau of Jail Management and Penology.
Nahibaluan nga kada vial ang sarang magamit sang tatlo tubtob apat ka persona depende sa ginarequire nga dosage.
Samtang ang ginalibre lamang ang category 3 ukon may dako nga pilas tuga sang pagkagat sang sapat.
Bangod may executive order na si Bacolod City Mayor Greg Gasataya sa libre nga anti-rabies vaccine, prayoridad sa gihapon nga mahatagan ang mga senior citizen, indigent kag marginalize sector.
Ang mga middle class ang mahimo man mahatagan apang kinahanglan anay nga magpangayo sang certification gikan sa Department of Social Services and Development (DSSD).
