Nangin mabaskog ang mga pag-ulan halin kahapon sang hapon tubtob na sa gab-i sa Bacolod City kag Negros Occidental, nga nagresulta sa mga pagbaha sa pila ka lugar.
Ini bangod sa epekto sang Southwesterly windflow ukon ang hangin nga gikan sa nabagatnan-nakatungdan.
Lauman subong tubtob bwas nga mangin malain gihapon ang tiyempo bangod luwas sa Southwesterly windflow, magatuga man sang epekto ang Trough ukon extension sang isa ka Low Pressure Area nga yara sa gwa sang Philippine Area of Responsibility.
Padayun ang paandam sa paghalong sa mga posibilidad sang pagbaha kag landslide.
Alas-11:10 kagab-i ang Tropical Storm QUEDAN ang nakagwa na sa PAR.
Ang Bagyo ang ulihi nasiplatan sa 1,350 km/h sa East Northeast sang Extreme Northern Luzon.
Dala sini ang kabaskugon sang hangin nga nagadangat sa 75 km/h kag pagmadlos nga tubtob 90 km/h samtang nagahulag sa padulong sa naaminhan-nakatungdan nga dereksyon sa kadasigon nga 20 km/h.
Samtang ang ginamonitor nga LPA sa Southern Luzon ang natunaw na alas-8:00 kagab-i.
Alas-2:00 kaina sang kaagahon, liwat nga may namonitor nga panibag-o nga LPA sa gwa sang PAR.
Ini ang ulihi nasiplatan sa 335 km west northwest sang Pag-asa Island sa Kalayaan, Palawan.
Ini ang nagahulag padulong sa naaminhan nga dereksyon kag indi magasulod sa PAR, samtang wala man nakita ang posibilidad nga ini ang mangin Bagyo.
Ang Trough sang nasambit nga LPA upod sa Southwesterly windflow ang ginalauman nga magaapekto sa Southern Luzon, Visayas kag Mindanao tubtob sa masunod nga duha ka adlaw.
