Nangin madinalag-on ang ginpatigayon nga “Grand Rosary Rally against corruption” sang Diocese of Bacolod kahapon sang hapon.
Nagtipon ang masobra sa 3,000 ka mga katoliko sa apat ka nagkalain-lain nga bahin sang ciudad kag nagparada agud magkit-anay sa San Sebastian Cathedral.
May yara sang misa nga ginpatigayon sa simbahan sa pagpanguna ni Rv Fr. Patricio Buzon, Bishop sang Diocese of Bacolod.
Sa homiliya ni Rv Fr Buzon, iya ginapadumdum nga ang kabuhi sang tawo may mga kabudlayan gid nga maagyan.
Suno diri, kun kaisa ang iban nga kabudlayan sobra-sobra na para sa mga tawo.
Pahayag ni Buzon, madamo sang natural disasters nga nagluntad kaangay sang linog, baha kag bagyo apang ini tanan masarangan sang tawo, indi kaangay sa kalamidad nga human mismo sang tawo ukon sang mga lideres sang pungsod kun sa diin ang korapsyon kaangay nga indi na mapatihan bangod tuman ini ka lapnagon.
Samtang, natapos naman nga matawhay ang ginpatigayon nga Grand Rosary Rally bangod wala sang iban pa nga grupo nga nag-intra sa isa ka religious event.
Sa interview sang Bombo Radyo Bacolod kay Police Major Elmer Bonilla, head sang Traffic Enforcement Unit sang Bacolod City Police Office, may mga traffic enforcers kag kapulisan nga gindeploy para mag-assist sa rally.’
