Peke ang Official Receipt kag plate number sang gin-abandona nga panel van nga may karga nga kapin P20 million nga balor sang smuggled cigarettes sa Purok-6, Barangay Nagbo-alao, Basay, Negros Oriental sang Sabado sang udto.
Madumduman nga apat ka panel van ang gin-abandona apang isa lang diri ang may karga nga smuggled nga sigarilyo.
Sa interview sang Bombo Radyo Bacolod kay Police LT Edwin Santos, Chief Special Operation Team sang Negros Island Region Highway Patrol Group, ang van nga may karga nga mga smuggled cigarettes may yara sang OR apang ini nakarehistro sa lain nga salakyan samtang ang plate number naman para sa mga dump truck.
Suno diri, tubtob sa karun wala pa sang may nagclaim sa van nga sa iya pagpati nahadlok na nga maggwa ang tag-iya.
Samtang, nagapadayon naman ang inventory sang Bureau of Internal Revenue sa mga smuggled cigarettes.