Ginatun-an sang Bacolod City Government ang pagrepaso sang Bacolod City Ordinance 338 ukon ang Traffic code of Bacolod City, nga naga-regulate sang mga salakyan nga nagaagi sa downtown area sang ciudad.
Sa interview sang Bombo Radyo Bacolod kay Police Major Elmer Bonilla, pinuno sang Traffic Management Unit sang Bacolod City Police Office, ginatun-an ang tanan nga dalagko nga mga salakyan kaangay sang cargo truck kag wing vans ang paagyon sa Bacolod-Negros Occidental Economic Highway (BANOCEH).
Ang magaagi sa circumferential road, sa dalan Lacson kag Araneta amo ang mga pribado nga mga salakyan kag traditional kasubong man ang modernized Public Utility jeepneys.
Suno kay Bonilla, mahimo nga mahatagan man sang waiver ang mga delivery vans nga naga-deliver sa downtown.
Samtang santo sa ginpatigayon nga consultation sang TMU sa City government sang nakaligad ang mga dalagko nga salakyan nga nagagamit sang katunga sang dalan ang igarekomendar na nga magaagi sa BANOCEH.
Nakasaad sa City Ordinance nga ang mga dalagko nga salakyan kaangay sang trucks ang makaagi sa bahin sang Dawis area kag Bata area.
Ang City ordinance nga ginabasehan sang pag-regulate sang trapiko ang pila naman ka dekada gani ginatun-an nga repasuhon.
Ini bangud indi na ini applicable sa karun nga sitwasyon sang dalagan sang trapiko kag madamo na ang mga salakyan nga nagaagi sa downtown area.
Suno kay Bonilla, tion na agud nga repasuhon ang ordinansa kag tun-an kun ano ang makapamaayo sa Bacolod City.
Ginahulat sa karun ang rekomendasyon sang City Council depende sa resulta sang ila pagtuon para sa pagrepaso sang Bacolod City Ordinance 338 ukon ang Traffic code of Bacolod City
