“Nan amo na ang gusto mo lit, hala atubanga lit. Kay natabo na ang bata mo, indi ka gusto nga kwaon namon ang bata mo, ara!” – Lola ni Freya Mae Diesmo Go

Tuman ka sakit para sa lola sang 17 anyos nga dalagita nga nasapwan patay sa kahilamunan nga bahin sang Barangay 12, Bacolod City kahapon nga makita ang gindangtan sang iya apo.

Emosyonal nga ginpahayag ni Leah Diesmo, lola sang biktima nga si Freya Mae Diesmo Go sa exclusive interview sang Bombo Radyo Bacolod nga mahimo wala natabo ang krimen kun ginsugtan lamang nga sila ang magpa-eskwela sa apo.

Pahayag ni Leah nga ulihi niya nga nakita si Freya sang Oktubre 5 matapos nga may ginkadtuan sa La Carlota City kag ginpaapas sa iya bata agud madala sa ila sa banwa sang San Enrique.

Suno kay Freya siya ang may-utang gani nagkadto sa La Carlota, kag ini ang iya man ginpadal-an sang kwarta nga sobra pa sa iya balayran.

Suno sa lola, antes mag-abri klase, nagpahayag si Freya nga luyag sini mag-eskwela kag ginsuhestyon man niya nga ini magsulod sa Alternative Learning System, agud matapos sa Grade 10 kag makaderetso nalang sa Grade 11.

Gintanyagan man nila ini nga sila na lamang magapa-eskwela kaangay sa iya magulang.

Apang sang Oktubre 11, nagtawag ang amay sini nga si Joselito Go kag nagpahayag nga kun mag-eskwela si Freya dapat sa Bacolod City kag indi ini magsugot nga sa San Enrique.

Aminado si Leah nga naglain ang iya nga buot kag ginhambalan ang iya nga apo nga indi na magtawag sa ila kun indi man lang makadesisyon sa iya kaugalingon.

Ginhambalan niya man ini nga kun indi mag-eskwela magtrabaho nalang kag sagudon ang iya amay.

Pahayag sang lola nga luyag gid sini nga maka-eskwela ang iya apo apang indi man nila makuha ang bata bangod masabad ang iya amay.

Indi man sila makadesisyon bangod ini ang may ginikanan.

Kabahin sang exclusive enterview kay Leah Diesmo, lola ni Freya Mae Diesmo Go

Si Freya ang ikaduha sa tatlo ka mag-utod, apang ang magulang sini kag manghod ang mag-utod sa isa lamang ka tatay samtang si Freya lamang ang kay Joselito.

Kahapon, ginkadtuan mismo sang iya magulang ang bangkay ni Freya sa punerarya kag ini ang wala gid nakatulog sang segi lamang sang hibi.

Suno sa lola, tuman ka sakit sa ila nga makita ang sitwasyon sang apo.

Apisar indi maseguro, nagakomiter ini nga kun yara sa ila ang apo ila ini nga mabantayan kag maseguro nga ini ang balay kag eskwelahan lamang.