Nagapanawagan ang City Director sang Bacolod City Police Office sang kooperasyon sang mga establishmento nga ginpadal-an nila sang request para sa CCTV footages bilang kabahin sang imbestigasyon sa kaso nga pagpatay kay Freya Mae Go.
Sa interview kay Police Col Joeresty Coronica, tubtob sa karun wala pagid sang nagpalapit sa mga kapulisan agud boluntaryo nga maghatag sang impormasyon may kaangtanan sa nasambit nga kaso.
Suno kay Coronica, padayon ang ila nga forward kag backtracking sang mga CCTVs gani nagapanawagan sila sang kooperasyon sang mga establishmento.
Suno diri, ang ginalauman nila sa karun amo nga may magsabat sa panawagan sang LGU sa kun sin o ang makahatag sang nagakaigo nga impormasyon nga makabulig sa imbestigasyon ukon makatudlo sa naghimo sang krimen ang makabaton sang padya nga P100,000.
Isa man sa ginalauman sang mga ini nga makakuha sang CCTV footage gikan sa mga establishmento.
Ang forward kag backtracking sang CCTV ang nagakinahanglan sang tion gani kun wala sang kooperasyon ang mga establishmento magadugay ang imbestigasyon kag ini ang ila naeksperyensyahan sa karun.
Nag-apelar ang City Director sang BCPO sa mga establishmento nga magkooperar sa mga imbestigador agud nga makakuha sila sang valuable evidence paagi sa paghatag sang CCTV footage agud nga maresolbar gilayon ang kaso ni Freya Mae Go.
Dugang pa sini nga kun may yara sang missing link mabudlay na sa mga kapulisan ang magtaod-taod sa mga natabo rason nga kinahanglan sang kooperasyon.
Sa 26 ka business establishments nga ginhatagan sang request para sa CCTV footage, apat pa lang ang nakahatag sang nag-respond.
Nagapanawagan man si Coronica sang kooperasyon sang mga pumuluyo agud nga mabuligan sa pagresolbar sa kaso.
Suno pa sa City Director nagpadala siya sang request kay Councilor Pao Sy kag Bacolod City Vice Mayor Claudio Jesus “Kalaw” Puentevella agud nga mapadasig ang amendment sang CCTV ordinance.
Ini agud nga ma-compel ang mga business establishments nga mag-install sang CCTV nakadepende sa kadakuon sang establishmento ang Numero sang CCTV camera nga itakod.
Dugang pa nga ma-compel sang mga kapulisan ang mga establishmento sang ila compliance ingkaso nga kinahanglanon sang CCTV footage.
Suno Kay Coronica, sa Karun Ang pagkuha sang CCTV footage ang nagakinahanglan sang court clearance kag nagapasalamat sila sa mga establishmento nga nagahatag bisan wala sang nasambit nga clearance.
