Naanod sa baha ang siyam ka miyembro sang isa ka pamilya sa Purok Kamansi, Barangay Mailum, Bago City kun sa diin duha nasapwan nga patay, anum ang missing kag isa ang nakasalbar.
Sa interview sang Bombo Radyo kay Police Captain Emman Anacleto, deputy chief of police sang Bago City Police Station, sa pahayag sang nakasalbar nga si Roy Sinoro Jr., 23-anyos, 50 meters ang kalayuon sang ila balay sa suba kag ginabanta duha ka poste ang kadalumon sang balay.
Alas 11:00 kahapon sang aga, hinali lamang nga nagsaka ang tubig kag gin-anod ang duha ka mga puluy-an kun sa diin wala sang tawo ang isa, samtang sa isa naman, didto nagapahuway ang walo ka miyembro sang iya pamilya.
Suno kay Anacleto, ginpahayag ni Sinoro nga yara ini sagwa sang hinali nga nagsaka ang tubig gani siya ang nakahingagaw langoy pakilid kag wala na nahibaluan kun ano ang natabo sa ila balay nga gindala sang tubig.
Nagpatigayon sang search ang rescue operations ang kapulisan kag nasapwan nga wala na sang kabuhi sa ang iloy nga si Jennilyn Sinoro kag ang bata sini nga si Joy Sinoro samtang padayon pa nga ginapangita ang anum ka miyembro sang pamilya.
Yara naman sa kustodiya sang Bago City Police Station si Roy kag ginadebrief pa sang mga personnel bangud nakibot ini sa nasambit nga insidente.
Magapadayon naman ang search and retrieval operation sang mga otoridad subong nga adlaw.
