Naglumpat gikan sa duha ka panalgan nga balay ang mag-iloy agud lamang makasalbar sa nagluntad nga sunog sa Purok Paghidaet, Barangay Tangub, Bacolod City pasado alas-12:00 kaina sang kaagahon.
Ginapahayag nga anom ka balay ang gintupok sang kalayo sa nasambitan nga sunog.
Sa interview sang Bombo Radyo Bacolod kay Mary Ann Patricio, nadula gid ang pinangabudlayan sini paagi sa balhas kag dugo.
Ini bangod nalakip sa mga nasunog kaina sang aga ang iya tyangge kag balay sa nasunog.
Suno kay Patricio, yara sa sulod sang tyangge ang anom ka bulan sini nga sinuptan nga nagdangat sa P18,000.
Kaina sang aga, naabtan sang Bombo News Team nga ginapamulot na lamang ang mga sinsilyo, bangod nag-abo na ang mga papelon sini nga kwarta.
Suno diri, nakabati sila nga may nagsinggitan sang sunog, apang sang ila tsekyaron dako na ang kalayo.
Ginapakamaayo na lamang niya nga may-ara sang piertahan sa ikaduha nga panalgan sang ila nga balay kag didto ini naggwa upod sa iya menor de edad nga bata.
Una nga naglumpat ang iloy, kag apisar nakaangkon sang samad sa tiil, ginpilit sini nga makabangon agud sal-on ang iya bata nga sunod nga naglumpat.
Suno kay Patricio, wala na ini nakahibalo kun diin magakadto bangod siya ang wala sang pamilya sa Bacolod, kag dutay lang ang pangilala.
Nagapanawagan ini sa sin-o man nga mahimo makabulig sa ila.
