Nagapanawagan ang provincial government sang Negros Occidental sa Philippine National Police nga mag-generate sang blotter report tuhoy sa mga napatay bangod sa paglaslas sang Bagyo TINO agud may-ara sang official record.
Ini bangod nagalain-lain ang figures sang mga ahensya.
Sa latest record nga ginpagwa sang Office of the Civil Defense – Central Office, yara sa 27 ang death toll sa Negros Occidental.
52 naman ang death toll sa ulihi nga report sang Provincial Disaster Risk Reduction and Management Office (PDRRMO).
Sa interview sang Bombo Radyo Bacolod kay Negros Occidental Provincial Administrator Atty Rayfrando Diaz, mas accurate ang numero nga nasanto sa blotter report sa kapulisan.
Pahayag ni Diaz nga mahina gihapon ang linya sang komunikasyon sa dako nga bahin sang Southern Negros Occidetal bangod wala sang signal, gani mabudlay ang pagtipon sang mga data.
Suno diri, kulang pa ang nabatun sang Provincial Government nga Rapid Damage Assessment kag Needs Analysis gikan sa mga LGUs, gani iban ang ila nalang mismo ginpadulungan.
Pila sa mga LGUs ang nagrequest sang StarLink agud lamang makasustiner sang komunikasyon.
Aminado si Diaz nga sa pagkadula sang kuryente naapektuhan man ang serbisyo sang tubig kag telecommunication companies.
Sa karun, ginatinguhaan man nga marestore ang power supply apang aminado ang mga ini nga mabudlay pa ang pagbalik sang kuryente sa mga nabukid nga lugar bangod madamo pa sang kinahanglan nga patigayunon nga mga clearing operations.
