Nagdangat na sa pito ang narekord nga napatay sa ciudad sang Bago, Negros Occidental bangod sa bagyo Tino.
Sa interview sang Bombo Radyo kay Andrea Marie Hojilla, Public Information Office sang Bago City Disaster Risk Reduction and Management Office, pito na ang narekord nga patay samtang apat naman ang missing sa ciudad.
Suno diri, kahapon sang hapon nakabaton sila sang report nga may nasapwan nga bangkay sa Purok Malipayon Baras, Brgy Maao nga gilayon ginpadulongan sang rescue team.
Samtang, kahapon sang aga may yara sang 27 ka pamilya ukon 58 ka mga indibidwal nga gin-evacuate kasunod sa pagluntad ang landslide sa Brgy Ilijan.
Nagdangat naman sa 4,855 ka mga pamilya ukon 16, 387 ka mga indibidwal ang yara sa karun sa evacuation centers bangod sa bagyo Tino.
Pahayag sini, mabudlay sa gihapon ang pagpasa sang impormasyon bangod bisan nga may yara sang signal, indi sa gihapon makapasa sang mensahe ukon makatawag.
Mensahe ni Hojilla, magmonitor sa weather update kag kun yara sa lugar nga nalakip sa high risk nga mga area sa tion nga may pagbaha, mas maayo nga magevacuate na sang timprano.
