Nakilal-an na ang babayi nga nasapwan sa Hda. Sto. Dominggo, Brgy Crossing Magallon, Moises Padilla, Negros Occidental, kahapon pasado alas-2:00 sang hapon.
Sa interview sang Bombo Radyo kay Elizer Bordado, live in partner sang biktima nga si Angelina Jaudian, sang Nobyembre 4, alas-8:00 sang aga, tubtob na sa liog ang baha sa ila lugar matapos mag-awas ang tubig sa sapa bangod sa Bagyo TINO.
Gin-utod ni Jaudian ang higot sang ila karbaw kag kanding agud bisan papaano makasalbar ang mga ini apang siya naanod sa mabaskog nga daludo sang tubig.
Suno kay Bordado, nakita sini nga naanod si Jaudian samtang nagasinggit nga siya tabangan.
Nagkupo sini Jaudian sa puno kag gilayon nga gin-utod ni Bordado ang higot sa ila mga kanding kag ginhaboy ang kalat kay Jaudian apang wala sini nalab-ot.
Naigo sang troso ang puno nga natumba kag naanod kaupod si Jaudian.
Suno kay Bordado wala na sini nasalbar pa si Jaudian kag nagsaka na lang siya sa atop sang ila balay kag suno diri naguba man ang haligi kag dingding sang ila balay kag nagpinsar na lang ini nga kun maanod gid man ang ila balay siya maupod na lang.
Nakasalbar si Bordado sang nagnabaw na ang baha alas- 2:00 sang hapon.
Pila ka adlaw sini nga ginpangita si Jaudian kag kahapon lang ini nasapwan nga wala na sang kabuhi nga natabunan sang dahon sang tubo kag wala na sang panapton.
