Nasalbar ang kabuhi sang 24 ka miyembro sang lima ka pamilya matapos magsaka sa atop sang balay sa nagluntad nga baha kasunod sa paglaslas sang bagyo Tino.
Sa interview sang Bombo Radyo kay Evelyn Sedon, residente sang Brgy Bulad, banwa sang Isabela, sang Nobyembre 4, alas- 4:00 sang kaagahon nag-umpisa ang pag-ulan kag alas- 10:00 sang aga nagdesisyon sila nga mag-evacuate na amo nga naghingagaw sila himos sang ila panyaga.
Apang, wala na sila naka-evacuate bangod segundos lang sang gulpyada nagsaka ang tubig.
Tuman ka taas sang baha nga naglapaw na sa tawo amo nga nagtingob sila nga magsaka sa atop para masalbar lang sila.
Naghulat sila nga tubtob alas- 4:00 sang hapon nga asta na lamang sa hawak ang tubig.
Dugang pa sini, may nakita sila nga duha ka bata kaupod ang ila tiya nga matabok lamang kun tani sa dalan apang bangod madasig ang pagsaka sang tubig nagdalagan ang duha ka bata sa puno kag nagsaka sa puno apang ang ila tiya naanod gid kag nasapwan na lamang nga patay sa Moises Padilla.
Sa karun, nagkalamatay ang ila mga manok, naanod kag nakalaguba ang ila mga gamit, apang nagapasalamat na lamang ini nga wala sang may napatay sa ila pamilya.
Suno kay Sedon, kabay pa nga indi na maliwat ang natabo bangod wala na ini nakahibalo kun ano ang himoon nila nga pamilya.
